Sunday, March 31, 2019

Thlemna (sermon tawi)

Thlemna (Short sermon)

Bible chang I lo chhiar ang u

Jakoba 1:12-13
Fiahna tâwka ding nghet tlat chu a nihlawh e, fiaha a awm hnuin Lalpan amah hmangaihtute pêk a tiam, chawimawina lukhum, nunna chu, a chang dâwn si a. Tu man thlêmna an tawhin, “Pathianin min thlêm alâwm maw le,” ti suh se. Pathian chu sual tûra thlêm rual a ni lo, amah lahin mi a thlêm ngai bawk hek lo.

Vawiin a hetah rawn inkhawm te zing ah hian thlemna la tawk miah lo kan awm ka ring lo. Thlemna lak ah tal chhuah hi chu a har a ni, mahse thlemna tin hi thil tha tih na chance a ni ve tih hriat theuh a tha in ka hria.  Thlemna hi Satan a tih chhiat na hmanrua a nih lai in, Pathian chuan nang mah siam that zawk nan a hman a hmang a ni. Sual tih ai a thil tha I tih apaiang khan Pathian i hnai sawt tih in hria ang che. Thlemna hi thli ni ta se, keini thingkung, thli a nasat pauh leh thingkung zung in pawt nghet ang kha kan ni mai..


Galatia 5: 22-23  -
 “Thlarau rah zawng hmangaihna te, lâwmna te, remna te, dawhtheihna te, ngilneihna te, ṭhatna te, rinawmna te, nunnêmna te, insûm theihna te a ni. Chutiang kalh zâwng Dân a awm lo ve”

Heng bible chang te hian Isua mizia a ti lang chiang hle, keini pawh thlarau rah te neih tum hian theihtawp kan chhuah ve a ngai, Isua Krista ang tur chuan Dan 10 ringawt zawm kha a tawk lo, kan  nungchang siam tha tur chuan duh thlan na a awm a ngai, thlemna avang hian duhthlana kan nei a ni. Tunah kan chhiar tak ang khan hmangaihna a pawimawh zia a rawn sawi, mahse kan bul ah mi hmangaih har tak tak, mizia tha lo, mi thin chhia te, mi duham te an awm ang, Lawmna ai ah dam loh na, thihna leh tahna hmun ah te kan awm ang, remna hmun ai ah buaina hmun, mi a tha lo zawng a  min rel na hmun ah te kan awm ang, Nunnemna ai ah thin chhiat na leh thinrim duh na hmun ah kan awm ang, kan hnathawh pui leh kan chhung te min chheih kawlh tak tak te kar ah pawh insum hram hram a ngai dawn a ni. Rinawm hi  thlemna awm loh na ah chuan rinawm a awl viau ang, mahse pawisa leh tisa thlemna ah chiah khan I rinawmna chu a lang dawn a ni. Hetiang dinhmun ah hian a nia, Isua in a thlarau rah than tir a tum dawn tih I hre tlang theuh ang u. 


I. Thlemna thawh dan:

a. Diabola hi a fing a, kan mizia mil in min thlem thin.
Chakna - Diabola hian kan tisa chhung ah chakna a siam a ni. Setna hian kan thil tih sual chakna ah khan min thlem zek zek mai a ni.Kan thil tih sual tum na kha keimahni ah tumna leh chakna a awm loh chuan thlem theih kan ni lo. En tir nan keimah ah thisen rap lutuk ah khan mi thah duh na rilru ka nei lo hrim hrim, Diabola chuan khati lam lo zawng in ti sa chakna lampang zawng in mi a thlem thei deih a nia. Chhungril ah a nuam tur zia te suang tuah in, in thiam na nen thil tih sual chakna kha kan chhungril ah a rawn tuh lut a ni.

Matthia 15: 19 
“Thinlung aṭang hian ngaihtuahna sual te, tualthahna te, uirena te, inngaihna te, rûkrûkna te, dâwta hêk te, Pathian pawisawina te a lo chhuak si ṭhîn a”.


b. Ringhlelhna:
Satana hian mi thlem tur hian kan rilru ah rinhlelhna a rawn tuh lut thin a ni, a dik lo tak tak ang em? Pathian in a phal lo tak tak em mi? Hetiang a thil phal loh te hi chu ka tan ni lo in midang tan a ni ang tih na rilru a rawn tuh lut thei a ni.

Hebrai 3: 12-14
Unaute u, fîmkhur rawh u, chuti lo chuan Pathian nung tlûksan tûrin tu thinlungah emaw rin lohna sual a lo lût dah ang e. ‘Vawiin,’ tih a nih chhûng hian in zînga tu mah suala an tlûka, an thinlung an tihkhauh loh nân nî tin infuih tawn zâwk rawh u.

c. Thu awih loh na:
Thlemna hi rilru ah a lo intuh tawh chuan, kan mizia ah pawh nghawng thui tak a nei a ni. Kan mizia ah a thlemna te reuh te a lang kha kan mizia ah a rawn lang tawh a ni. Diabola tan hian kawngkhar te reuh te kan hawn chuan, a hnu ah chuan kan kawngkhar te reuh te kan hawn kha a rawn hawng full pap mai dawn a ni.

Jakoba 1:14-15
Mi tin hi mahni châkna suala thlêm an ni ṭheuh zâwk a, chu chuan a hîpin a hruai bo ṭhîn a ni. Chu châkna chuan no a pai a, sual a hring a, a lo puitlin chuan thihna a hring ṭhîn.

He bible chang hi dik kan tih theuh ka ring a, sual chakna chu thihna a hring thin kan tih hi. Tunlai Mizoram ah ngei pawh kan tlangval tleirawl te thih tam zia atang hian a chiang hle in ka hria. Sawi zawm vak ngai na pawh a awm tawh lo.

II. Thlemna Dodal dan tur:

a. Tlawm suh:
Diabola hian mi a thlem hian Kristian tam tak te chuan an rilru ti hrehawm in, in thiam lohna te an nei a, thlem a an awmm kha pawi an ti thin a ni. Thlem a i la awm khan lawm zawk tur i ni. Diabola hian a pawl te, a thlem thluk tawh chiang lutuk te chu thlem tlak vak ah pawh a ngai kher tawh lo ang, sual a tlu lut tawh te chu an chet dan a bet nghet tawh lutuk avangin.
Thlem a awm hi thil sual a ni lo, Isua pawh kha thlem a ni, mahse thlem in a awm lo. Thlem a kan awm chauh hian thil sual kan ti a ni.

Entirnan Isua in mi tin hi ti sa chakna min pe a ni, chu chu thil tha lo pawh a ni chuang miah lo. Isua chuan I nupui kha hmangaih leh duh tur in a duh che a ni. Hmeichhia dang hmeltha emaw nalh tih pawh thil sual a ni lo, amerawhcu thinlung ah uire duh na rilru a rawn luh tawh chuan sual a rawn lut a ni tih hriat a tha. Eve pawh kha thlem a nih khan thil sual a la ti lo, their a ei chiah khan a ni thil sual a tih.

b. Thlemna thawh dan hrethiam rawh:
Kan hre theuh ang a, a hun leh hmun a zir in thlemna a tluk a awl zawk dawn tih hriat a tha. Diabolan hian a zir chiang tawh che tih hria la, eng tik ah tak nge sual a i tluk dawn tih a hria, awlsam tak a thlemna i tawh theihna hun tur kha a chang reng a ni tih hria ang che.

1 Peter 5:8
Ngaihven ula, fîmkhur rawh u; in hmêlma Diabola chu, sakeibaknei rûm ṭhîn angin ei tûr zawngin a phî ruai ṭhîn.

Ngaihtuah chhunzawm a tan, heng hi ngaihtuah rawh, thlem a i awm in tu nen nge ka awm, eng tik ni ah nge, Weekday nge weekend ah?  Dar eng zah ah nge min thlem thin, chhun ah nge zing ah? Ka bul ah tu nge awm thin, hnathawhpui, keimah nge thian te nen ka awm lai in? Tunah chang ka rawn chhiar tak ang khan Diabola kha chance pe suh ang che.Kei pawh welfare lam ah buaina neih hun hun hi ka lo chhut thin a, tlai leh zan lam, hnathawh loh lai a ni tlangpui, Weekday ai in weekend ah hian buaina a tam zawk thin bawk a ni. A hmun pawh a pawimawh hle, inkhawm lai emaw tawngtai lai a buaina tawk an tlem viau, Thian te emaw mahni ruih buai lai a buaina tawk an awm fo bawk.

c. Isua tanpui dil rawh:
Isua hian police emaw ambulance helpline ang deuh hian dar kar 24 helpine a nei tih kan hre theuh awm e. Isua chuan dawh thei tak in kan mangan na ah min ngaithla hman reng a ni tih kan hre theuh awm e.

Sam 50:15
Mangan ni-ah min ko ula,
Ka chhanhim ngei ang che u,
Tichuan, min chawimawi ang.

Isua hian mi tanpui a in huam reng, mahse thil sual tih dawn chuan Isua helpline call a har khawp in ka ring, chhungril ti sak chakna awm lai a, thil sual tih dawn kha chuan tanpui kan duh lo pawh a ni mai thei, kan tan a tha ber kha.

Kei ngei pawh CMWA welfare hruaitu ka nihna ang in phone call ka dawng ve thin - Mi boral te, accident tawh te, Vai nen a in tihbuai te, dam lohna te, Police station case te leh hlawh lak theih loh na case ah te. A chang chuan phone call ning chang te pawh a awm ve, mahse Isua chu kan tan eng tik lai pawh in dawhthei tak in min ngaithla hman reng a ni tih hriat a tha.

Hebrai 4:16
Chutichuan, puih kan ngaih hun taka zahngaihna leh khawngaihna kan hmuh theihna tûrin, khawngaihna lalṭhutthlêng chu huai takin i hnaih ang u.

d. Thlem a i awm in, thil dang ngaihtuah rawh:
Thil zuar tu te, corporate lam ah chuan marketing ti tu hi an han thiam khawp a, an fakna in kan thinlung an rawn tuh lut phawt a, chuan kan  chakna rawn tih tho an tum a, chuan kan chet zia rawn thlak an tum a ni.

Mi thlem nan hian TV ah te KFC tui hnai tak an rawn fak hi chuan KFC ei duh na kha kan rilru ah a rawn in sual nghal ringawt mai a ni, KFC thlemna ang deuh khan keini pawh Diabola hian min rawn thlem hian , kan ngaihtuah pauh leh, a ei chakna kha kan rilru ah a in tuh nghet zawk mai a ni. Khatiang thlemna a do a do ai chuan kan rilru kha hmun dang daih ah hawisan kha a tha ber.  Davida, Betsebi uire pui tu pawh khan Sam ah hian tihian a ziak a ni.

Sam 119:37
Thil lawilo en lo tûrin ka mit min lâktîr ang che,
I kawnga kal tûrin min tiharh rawh.

Hetiang thlem a kan awm loh nan chuan a tul ang a chet thiam a ngai a ni. I TV kha i addict viau chuan TV kha hmun dang ah dah mai rawh, mi an rel a nih chuan mi relna atang khan kal san mai rawh, khuai in a zuk che chuan khua in a zuk loh ah che kal bo mai rawh. Kan ngaihtuah na ah te fimkhur I la,

Filipi 4:8
A tâwp berah chuan unaute u, a dik leh zahawm apiang, a fel leh thianghlim apiang, a duhawm leh thangmawi apiang, a ṭhata, fak tlâk a nih phawt chuan, chûng chu ngaihtuah rawh u.

Thlemna tawh lai a thil tha ngaihtuah chu a har viau in a rinawm, mahse beidawng lo in thlarau thianghlim tanpuina in thlemna chu hneh ngei kan tum turi a  ni, Kan tluk pawh in tho leh zel kha a pawimawh.

e. I thlemna tawh thian tha te emaw support group ah thlen rawh:
Thlemna leh sual a kan tluk tawh chuan, beidawng a awl a ni, tih duh tawh loh pawh in, kan hriat loh lai in thlemna a tluk leh a awl a ni, mi hriat kan hlau, mualpho kan hlau. I thil tih sual kha Diabola chuan zep ru tur che in a duh ang. Chhungkua harsatna te, a ruk a thil kan tih te, mi hriat  kan hlau mahse khang kan sualna te kha  keimahni tumruhna ringawt a do theih a ni tawh lo, thlah har kan ti tawh a ni. Hetiang dinhmunn ah chuan thian tha te mi tawngtai pui thei tu leh huai tak a mi fuih ngam tu kan mamawh a ni. Zu ngawl vei te pawh Alcoholic anonymous an nei, chutah chuan zu an kalsan tum dan te an sawi thin a ni.Chutah chuan judgement awm miah lo in an rilru hahna an ngaihthlak sak thin a ni. Kan thian te hnenah kan harsatna tawh te kha kan hrilh khan pressure cooker kan phit tir thin ang hian kan hrehawmna te leh kan rilru hahna te kan pe chhuak ve a ni. I nun ah khan buaina leh harsatna I neih kha nangmah in i chingfel thei kher lo ang, i chaklohna te kha pawm in tanpuina dil kha zak suh ang che.

Jakoba bung 5:16
Chutichuan, in sualte thupha chawi tawn ula, inṭawngṭaisak rawh u; tichuan, tihdamin in awm dâwn nia. Ṭhahnemngai taka mi dik ṭawngṭaina chuan thil ropui tak a thawk thei a ni.

f. Diabola do rawh:
Kan chakohna te kan pawm tawh chuan Jakoba 4:7 chuan ti hian a ti a ni.
Chuvângin, Pathian hnênah intulût ula, Diabola erawh chu dodâl rawh u; tichuan, a tlânsan ang che u. Pathian hnaih rawh u, ani pawhin a hnaih ang che u. Mi sualte u, in kutte sil fai ula, mi vervêkte u, in thinlung tithianghlim rawh u.

Thlemna i tawh chuan thil dang ngaihtuah rawh ka ti zo chiah a, tunah Diabola do rawh ka rawn ti leh daih bawk si a, ka thu sawi a in kalh viau pawh in rawn ti mai thei. Diabola do ka tih hian indo a Diabola va insual pui emaw va beih lampang a kawk lo, Tirhkoh Puala thuziak ang a in veng tur zawk in a ni ka tih zawk,

Efesi 6: 17
Chhandamna chu lukhumah hmang ula; Thlarau khandaih, Pathian thu chu pai rawh u.

Isua kha khawvel a awm lai khan Setana khan a thlem khan Bible chang hlir in a nih kha a chhan, a ril tam a ei tur nen a thlem khan “ka ril a tam lo a ti lo”, Bible chang in a chhang mai a nih kha.  Kan ralthuam tha ber leh kan bullet neih that ber chu bible chang a ni tih hria in, bible chang a tam thei ang ber zir i tum tlang ang u.

Setana hi mahni felna leh chakna in lo do ve ringawt chi a ni lo, Setna hi kum sang tam tak experience nei a ni tih hria la, va hnial emaw  te va tum ve ringawt suh. Setana lak ah ka fel tawk e tih a, nangmah in a thlemna lak ah va do ve ringawt i tum chuan a hneh chiang dawn lutuk che. Bible chang zir leh tawngtai kha a pawimawh ber tih hria ang che.

A tawp ber ah thlemna hi Isua min hnaih tir zawk thei a ni tih hria la, thing te pawh thli a tleh nasat pauh leh a chak zawk ang hian, thlemna kan paltlang tam chuan Isua kan hnaih zawk dawn a ni. Thlemna lak ah I tluk khan beidawng lo la, Isua en zel en, a tanpuina dil la, chawimawina lukhum in a nghak che tih hria ang che. AMEN