Monday, August 22, 2016

Chennai Mizo Fresher 2016 Thuchah


Chennai a Mizo rawn awm thar te, Chennai khawpui ropui ah hian ka welcome duh che u a. In lung te pawh a leng duh viau in ka ring a, mahse pachang hram tur leh Chennai Mizo hming ti tha zawng a awm tur in ka chah duh che u a. Chennai atang a Mizo zirlai zir chhuak leh hnathawk a awm tawh te Mizoram lam ah hming tha tak tak chher chhuak an tam hle.

Awle, Chennai in awm chhung a awm dan mawi leh do’s and don’t tlem a zawng ka rawn sawi phawt duh a:

1.       Rental Agreement – Chennai I awm chhung in Hostel ah te I awm lo a nih chuan, In I luah ngei ang a, chutiang a nih chuan Rental agreement siam ngei ngei ang che, I rental Agreement ah  chuan thla tin I in luah man bak ah, notice period te, in chhuah tir mai theih loh na te, Rental deposit pek zat te chiang tak in ziak thla vek ang che. Rupees 20 Stamp paper hmang in a Rental agreement hi a tih theih a ni. Rental agreement te In neih chuan nakin ah House owner te'n Rental deposit an pek let duh loh pawh in hma lak a theih a ni.

2.       Staff Contract – Chennai ah hna thawk tur a I lo kal a nih pawh in, chiang tak in I hna thawh n ate nen contract neih tum ang che. Chu mi contract ah chuan I hlawh zat tur te, ban dawn pawh a notice period te, I hna thawh tur te chiang tak a ziak tur in I ti dawn nia. Staff contract  te In neih chuan nakin ah hlawh an pek duh loh che u pawh in hma lak a awl. In hna thawh na te'n nakin ah in hna thawh tawh na hlawh an pek duh loh palh tak in, in hna thawh na attendence te phone camera emaw in thla la thin a tha.

3.       Zu leh Drugs- Chennai ah Mizo te zing ah mawi lo tak tak a zu in a, buaina siam te an awm thin a, hetiang Mizo ti hming chhia zawng a awm te chu welfare in an chung thu kan ngaihtuah ang.

4.       Transportation 

1.       Hmeichhia I nih chuan zan rei ah nang mah chauh in motor ah chuang suh, Ola emaw Uber pawh ni se, a him lo. 
2.       Bus chuan in Mipa tan, hmeichhia bul a thut a thiang lo, mipa lam ah chauh thut tur.
3.       Awm na veng bus number hriat hram tum ang che.
4.       Auto chuan ai in Uber emaw Ola hmang ang che, a chuan man fare a fixed a, sawi buai a ngai lo deuh.

5.       Tamil Culture
1.       Tawng nuih sawh suh, an tawng hi an ngai hlu hle a ni.
2.       Tamil chaw hi a tui, a theih chuan ei ve tum ang che. Tui I in in , I hmui  in no kha si suh.
3.       Tamil Nadu a kan mi lar te, Rajnikantha te, Jayalalitha te fiamthu in an hnam pui hma ah nuih sawh suh ang che.

6.       Tui hleuh
Marina beach emaw khawi beach ah pawh in ti pa leh huaisen tak in tui va hleuh tum ringawt suh ang che, lui emaw swimming pool ang a ni lo va, mi pawh an tla hlum fo.

7. Kut Thlak
             Tamil ho hi a hnam ang in, hnam zai dam leh mi kut thlak ching lo tak mai an nia a, an thinrim vawr tawp ah pawh, an in hau vak vak duh chauh a, a theih hram chuan kut thlak hmasa lo a tan hi a tha khawp mai.




Ka tet lai in , ATS, Jowai bul ah hian kan awm thin a, Chu school ah chuan ka pa Principal hi a ni  thin, 1986 to 1999 vel, Fresher tam zawk hi chu in la piang lo ang.  Ka thawn thu sawi tur hi fimkhur tak in lo ngaithla dawn nia.


Lalsanga Pautu thlalak a ni. Amah chu hna sang thawk pawh a ni lova. Shillong khawpui bul Jowai a Bank vengtu ve mai a ni. Bank a vennaah chuan silai ulhbun phir a keng a, silai mu pawh a kawngah a pai mai thin. Vawi khat chu Khasi hel pawlin chu bank chu rawk an tum a, motor in an rawn tlan a, bank rawk tumtu te chu mi 15 vel an ni. AK47 pawh 2 lai an nei nghe nghe. Ral khat atangin bank chu an rawn kap nghal thuai thuai mai a. Bank hnathawk zawng zawng leh bank vengtu thenkhat chu kah hlum hlauin chhuatah an bawk phek vek a. Lalsanga Pautu chuan zam miah lovin a dinna duty post atang chuan a ulhbun silai chuan chung hel ho chu a lo kap let a, bank suam tum helho engemawzat a kap hliam ta hlauh a, darkar khat leh a chanve vel an inkah hnu chuan helho chu an tlan chhe ta a, a kah hliam mi 5 vel chu Meghalaya police ten an man phah ta ni. 

Helho khan an piah lawkah sawn mi pakhat mi huaisen deuh a awm a ni tih an hria a, an hlau em em a, an tawn lui ngam lo. A tukah Shillong chanchinbu editor ten an interview a. "Khati em em a i huaisen kha a mak hle mai, engtin nge mi 15 lai mai, silai tha pui pui nei I lo tlawm mai theih le?" an ti a. Lalsanga Pautu chuan "MIZO KAN TLAN CHHE VE NGAI LO" a ti. A hnuah Meghalaya state-ah bank guard an lak dawnin advertisement ah "Mizo tlangvalin an dil chuan hnamdang tan dil buai a ngai lo ang" tiin an chhuah a, tute emaw ni chuan kan rinawmna te, tlawmngaihna te avang hian mizo hming an ti mawi thin. CYMA pawn Lalsanga Pautu hi chawmawina a hlan nghe nghe a ni. 

Tun a kan fresher lo awm te pawh nung chang fimkhur tur leh Mizo ti hming tha tur leh Mizoram ambassador tha tak ni tur  in ka sawm che u a ni.


No comments:

Post a Comment