Thursday, March 12, 2009

Intuai thar leh dan tur

Keini Mizo zing ah hian hman deuh atang tawh khan piantharna leh intuaitharna hi kan sawi uar hle a, mahse a daih rei tak tak vak lo - camp te kan kal a, hun rei lo te hnu ah ngai kan awh leh thin. Piantharna leh intuaitharna thuk tak nei tur hian pawnlam leh thlarau mai bak hian inthlak na chi hrang hrang kan mamawh a ni.

A hmasa ber ah, keini mihring te pawh hi Motor ang deuh in, intuai thar ngai, in service ngai mi kan ni. Kum engemaw zat kumthar kan lo hmang ve tawh ani ang, kumthar resolution-te siamin kan thil thalo tih thinte bansan kan tum fo thin . Motor kan service thin angin, kan thatlohna lai te zawng chhuak in, kan intuai thar ngaihna lai te in enin, intuai that a tul a ni.

Chutiang a intuaithar tur chuan keimahni kan in en nawn a, enge khawvela kan nun chhung hian kan thil tum, eng ang mi nge nih kan tum te hi kan ziah thlak a tul a ni. Entir nan, naupang thenkhat te chuan Doctor, Engineer, Zirtirtu nih te pawh kan lo tum a ni thei, chung chu lehkhabu a ziahthlak a en nawn a tha khawp mai. Chutiang bawkin, eng ang nungchang nge neih kan tum, mi thatchhia nge taima, mi felfai nge mi tawp, mi huaisen nge dawihzep, kan mize ngaihsan zawng pawh kha ziahthlak tel a tha khawp ang. Khang kan thil nih tum leh mizia nih duh zawng khan kan mi nih tum ah min chher chho thei dawn a ni. Khawvel ram sorkar te pawh an ram constitution ang zel in an ram pawh an kalpui a ni, entir nan America chu Democracy a ni, China ram chu Communist ram an ni, an nih tum ang zel in hma an sawn zel a ni.

Kan intuai tharna tur a tana kan thilhriat tur pawimawh a ka ngaih thenkhatte han hmu tarlan ka duh a. Chungte chu hmun 4 ah a then theih ang -

1. Chhungkua: Khawvel kan rawn chhuahna leh kan foundation nghet ber chu kan Chhungkua leh chhungkaw nun hi a ni. Kan chhungkaw nun hian kan mizia leh kan hlimna pawh a khawih thui khawpin ka hria. Entir nan, nupui pasal in kar ah pawh, nupui emaw pasal hna ah a buai lutuk chuan chhungkaw inhmuhkhawmna hun a tlem ang a, chhungkaw hlimna pawh a tlem phah theih a ni. Chutiang tho chuan chhungkaw thenkhat ah chhungkawpa ber zu ngawl vei te an nih chuan, chhungkua ah sum lamah ringawt pawh ni lo in, thlarau nun thleng in harsatna kan tawk thei a ni.

2. Sum: Kan Khawvel nun han enin sum um leh inchuh reng rengin mi zawng zawng hi kan buai emaw tih tur a ni. Kan sum duham lutuk avanga hna ah te kan buai lutuk a, chhungkua te kan thlah dah chuan, chhungkuaah buaina te a lo awm thin, chutiang bawk in chhungkawnu ber emaw fa te in chhungkaw pa ber hnen ah thil mamawh , thla tin hlawh pawh in a lei zawh loh an ngen chuan chhungkuaa pa ber pawh eirukna lama thlem a awl bik viau a rinawm. Sum um leh duham lutuk avang in, chiahpuam leh stock market ah mahni sum pawh ni lo, mi sum ba a pawisa khel te tan chuan, khang an sum hlauh atangte khan harsatna tam tawk an tawk thei a ni. Kan khawvel nun ah hian sum hi kan nun chhan ni lo vin, sum hi chu kan khawvel nun ti awlsam tur zawk chauh a ni.

3. Thian te: Kan khawvel thlir danah kan thian te thu min hrilh leh thu min rawnte angin hma kan la nasa ber a hriat a ni. Thian te tel lo chuan thil tih pawh a har, mahse kan thian te kan thlan danah hian kan fimkhur a ngai. Kan thian te an fel chuan thurawn tha min pe a, amaherawhchu thian tha lo te an nih chuan thil tha lo ah min hruai lut thei fo, hei hi sap ho chuan “peer pressure” an tia, thian te in zu in leh drugs ah te pawh min thlem thlu thei a ni.

Chutih rual rual in kan thian te leh kan chhung te’n thahnem ngai a min sawisel hian kan haw tur a ni lo, in siam that nan in hman a tul, mahse kan khawvel nun chhung hi chuan keimahni min ei lo leh min ngei - hmelma te pawh an awm thei, heng keimahni min hawtu te’n mi an relin emaw mi an sawi sel hian kan thinrim kher pawh a tul lo, Chinese thufing sawi dan tak in, hetianga mi in min rel a awmze neilo va kan lo thinrim vak khan mahni in tikang ang lek kan ni. Mi in min rel a, min sawisel in, kan hnial ve loh khan, kan dah hniam zawk a ni. Mi ropui leh mi puitling tan thil ho te te a lo thinrim hi thil tha lo leh zahawmlo a ni.

4. Taksa Hriselna: Kan taksa a hrisel loh chuan kan lekha zir, ngaihtuahna leh thlarau nun pawh a chau vek thei a ni. Bible a mi entawn tlak tak chu Daniala leh a thian te kha an ni in ka hria, an ni thian za ho kha ring lo mi te kar ah pawh an Pathian kha theihnghilh lovin, an taksa hriselna pawh kha an vawng tha tlat mai a ni. Kan taksa a hrisel chuan kan ngaihtuahna te a fim tha zawk a, kan dam rei zawk bawk ani.

5. Rilru lam Hriselna: Tunlai khawvel ah hian mi hi kan thatchhe sawt hle, a bik tak in lehkhabu chhiar ah, TV leh Movie te hi kan en peih em em laiin lehkhabu chhiar hi mi tam tak chuan tum pawh kan tum chhin meuhlo. TV hi a sual leh a tha lo ka tih na a ni lem lo, TV ah pawh hian program tha tak tak leh tangkai tak tak te pawh a awm, mahse lehkhabu kan chhiar loh chuan kan thluak hi kan hmang tak tak lo a ni. Entir nan Lehkhabu , movie a an siam hma chuan kan suangtuahna kan hmang nasa leh zual a ni, a chang tu te, an chan na hmun te, a chang tu te rilru ngaihtuahna te khan kan suangtuahna a ti thui zawk a ni. Chutiang bawk in lehkhabu chhiar in khawvel a mi fing leh mi ropui ber te, Nobel prize lo dawng te hial ngaihtuah zul zui pawh kan lo hre ve thei a ni, chutiang bawk in Khawvel mi ropui te autobiography emaw biography kan chhiar chuan harsatna an kal tlang dan te kan chhiar thei a, heng kan thil chhiar atang hian, thil fing leh thil tha tamtak kan zir chhuak thei a ni.

6. Sakhaw nun: Kan sakhua leh kohhran nun ah hian, inkhawm ringawt hi duhtawk lo vin, kan nun hi Christian nun a taka nun kan tum a tul a ni. Kan thlarau hriselna hi a pawimawh hle a ni. Kan khawvel nun min kaihruai tur chuan compass kan mamawh a ni, tuipui lawng a captain te chuan lawng an chuan na ah, compass North pole kawk reng hi an hmang thin a ni, khua a that emaw chhiat pawh in, compass in a kawh dan hi a in thlak ngai lo reng reng, chutiang bawk chuan keini pawh kan moral compass a tan a tha ber chu Pathian hnen a tawngtai leh Bible chhiar hi a ni. Kan tawngtai hian, sports mi te ang deuh in, kan thil tum, kan hlawhtlin tur te ngaihtuah tlat in Pathian hnen a kan dil a pawimawh a ni. Chutih rual rual in kan taksa- Isua temple pawh zuk leh hmuam lak ah te, mi relna leh sawiselna lakah te kan fihlim a tul a ni, chu lo zawng Bible in min zirtir ang in kan thil tih rah kan seng dawn si a.

Han funkhawm deuh nan, intuai thar tur chuan keimahni in en nawn a, kan chhungkua, thian, sum, taksa, rilru lam leh thlarau lam ah in service a, in siam that a intuai thar I tum theuh ang u.

He thu hi Chennai Mizo Inkhawm Jan Ni 4 khan sharing neih pui a ni.

5 comments:

  1. Tha lutuk tlat.! Tunlai chu hetiang bawk hi ka lo vei ve a. Hmanni khan Hyd inkhawmnaah sum chungchang hi ka thian pakhatin a sawi a, keiin kan "thil tum" hi mahni mai ni lo, Pathian ngaihdan ngaihthlak pawimawhna a ni.

    ReplyDelete
  2. Tluang, tha hle mai. A taka han ngaihthlak ngei pawh a chakawm viau mai a! I rawn sawi te hi thil pawimawh tak tak vek, kan hmaihthelh fo si an ni a. Hriat reng a pawimawh ngawt mai.

    ReplyDelete
  3. @ Hruaia, Pathian ngaihdan ngaihthlak chu a pawimawh khawp mai.
    @ Pu Faka - Nang ni in awm tawh lo va, a lung len thlak khawp mai, I thu suai te ngaihtlak leh a chakawm khawp mai, Pu Kunga te April ah min chhuahsan dawn bawk nen, Inkhawm lama min hruai thei kan mamawh dawn khawp mai.

    ReplyDelete
  4. Lal Isua kha Petera chuan Lungmawi - precious stone angin a sawi - Isua hi a belchiang apaing in an hmuchiang - diamond leh pearl te poh hi expert tan lo chuan a lem a tam; expert tur chuan belhchian a ngai, kan mimal nun pawh hi midang min belchiang tu ten lungmawi angin min hmu ve ang em tih hi hrereng chunga nun uluk hi a va tul em

    ReplyDelete
  5. Tlai khaw hnuah. A va'n tha thuai thuai ve le!! Hei tak hi a alawm Kristian in ti te hian kan mamawh chu. Bible pawhin 'Siamthar lehna tello chuan serhtan hi engmah a ni lova, serhtan loh pawh engmah a nilo' a tih kha. Siamthar fo kan ngai thin reng a ni. Chu chu kan kutah a awm.

    ReplyDelete