Thursday, January 3, 2008

TV Hian Eng thil nge I chungah a rawn thlen?


TV hi tunlai hun atan chuan inbiak pawhna lar ber a ni hial awm e.
Television in thlun zawm chuat mai chuan englai mai pawh hian
chhungkaw sing tam tak te chu chanchin thar chi hrang hrang—eng thil
pawh TV a lo lang te khan a deng dawt dawt reng a. Nu leh pa tam
takte tih tur pawimawh tak mai chu an fate hnena TV enna in a nghawng
theih thil te dik tak a hrilh fiah hi a ni. TV hi napangte tan chuan
zawngchhang awl em em mai leh thil tak tak anga an ngaih mai theih
thil a ni a. Khang an thil hmuhte an hriat thiamna atang khan an nun
kal chho zel chu a lo kai hruai thin a ni.

Napang pakhat chuan a thian pakhat a pa in a boral san ngui em em
mai chu heti hian a han hnem a, "Lungngai suh, i pa chu a lo kir leh
thuai dawn a law'm", a ti a. An zirtir tu pakhat chuan mak ti deuh
mai hian eng vanga chutianga a thian hnen a han ti mai nge a ni tih a
han zawh fiah chuan, chu napang chuan ni 2/3 kal ta a TV a film en a
lo hrilh a, chu filmah chuan a chang tupa an kah hlum tawh chu a lo
tho leh a lo ni a. Chu ngaihdan dik lo tak mai chu naupang rilruah
chuan a intuh a lo nih chu.

Awlsam taka kan in chhung lum a TV hmang a khawvel thil thleng
chanchin hrang hrang kan hmuh theih lain, napangte chuan a tak tak
nge suangtuahna lem mai a ni tih thliarhran harsa an ti thin a ni.

TV IN A NGHAWNG THIL TE CHU I LO THLIR HO TEH ANG
TESTNA A MARK HNIAM:
Thil chhut mite'n an hmuhchhuah pakhat chu `lehkha zirna kawng a ti
tha lo thin te hi TV en nasa an ni thin' tih hi a ni. Naupang
thenkhat in TV atanga ziak leh chhiar an zir laiin, naupang sangkhat
a za zel chuan an TV en nasat lutuk avangin an chhiar thei lova, a
then te phei chuan thu kamkhat pawh an ziak thei lo a ni. TV hi a
lem hmang a mi hipna tha tak a nih laiin, napangte tan ding taka an
thil ngaihtuah theihna ti tawi tu a ni.

THARUM THAWHNA LEH PAWIKHAWIHNA TI TAM TU A NI:
Kum 1969-ah khan Dr. Milton Eisenhower, National Commission of the
Causes and Prevention of Violence, USA a chairman chuan he ti hian
thu tlang kawmna a siam a: "Chhum lo chat lova tharum thawh lai thla
television hmang a kan hmuhte hian mihring nun hi a hruai khawlo a ni
tih kan pawm tlang a. Tharum thawhna TV a kan hmuh reng a tangte
hian hetiang ang nun hi kan chhawm chhova, nitin nunah kan
ngaihtuahna leh kan khawtlang hlutna hi tharumthawhna hian a ti chhia
a, chu chu khawvel chang kang siam tum tan chuan a inhmeh lo ni" a
ti.

CHHUNGKUA, HNAM LEH KHAWTLANG KEH DARHNA:
Zirtir theihna hi nu leh pa te'n an fate hnena an tih theih zing a
ropui ber pakhat a ni a. Napang te hnenah nungchang tha, chin dan tha
leh rinna te chu nu leh pa te'n an tuh dan angin an fa te'n an lo
chhawm thin a ni.

Mahse nang chauh kha chhungkaw hlutna siamtu i ni em? Ni love,
napang te hian awm dan leh chin dan tha chu an zirtirtu atang te, an
zirlaibu atang te, sakhaw hotu atang te, an thian kawm te leh an
thurualpui te atangin an zir chhuak a ni. Mit leh beng ti thlai thei
thil radio, TV, tape record, lemchan, lehkhabu leh chanchinbu atang
te in an in zir reng bawk a. Naupang te nun siam tu nitin a an tawn
thil chi hrang sang tam tak mai te chu i chhut chuan nang chuan
naupang te nun a chhungkaw hlutna tuh kawngah hmun i lo neih tlem zia
chu i hre thei ang.

TV programme naupang te'n an enah te chuan an mahni zitir i duh dan
mil programme te a awm thin em? Chung programme te chu an rinna
chawm tura i duh dan ang te an ni em? Nangma chhungkaw kaihhruaina
nen a in milin chung lemchan thawnthu buatsaihtu te, a director te,
ziaktu leh a chang tu te chuan an entir em?

SUALNA TI PUNGTU:
Telivision hi nungchang sual a min hruai tu a ni a. Chu chu thil
sawi hrehawm tak a ni a, mahse thil dik a ni bawk si a ni. A
tlangpui thuah TV programme te chu tharum thawhna te, mipat hmei
chhiatna hman khawlohna te, khawvel lama min hruai thei thil
lampangin a khat a. TV a kan en duh zawng programme-ah te hian thil
thleng tak tak, thianghlim, faktlak, duhawm, dik leh ngaihtuah zui
tlalk hmuh tur a vang hle a ni.

TV-ah hian rinawmlo taka chetna te chu entir na tha lam atan te
hman a ni zawk a. Dawt sawite chu a tam em em in, fiamthu bawlhhlawh
tak tak thawh nan a hman te a ni bawk a. Chutiang karah pawh chuan
dikna a i in thlun ngheh tlat chuan chung dawt thu tam tak te chu
ngaithlain hmu mahla i nghing dawn lo ani. TV lama sumdawnna te lo
thlir leh ta ila. TV a fakna chi hrang mai kan hmuhah teah hian a
fakna siam tu te hian rinawmna te, dikna hmang tein an buatsiah em?
TV hianin thlem kan awlsamna lai takah hian nasa takin kan rilru a la
peng thei a ni.

TV hian kan thil tha lamah nasa taka min fuih leh rilru a hneh
theih laiin tunlai kan khawtlang nun ti sawp rawp thei tu a ni thei a
ni.

THATCHHIATNA LEH TAKSA NGUAI NA:
Tunlai hian TV hi kan hun pawimawh hman ralna pakhat a ni a. Kan
naupang te hian an zirlai leh infiamna lam aiin an ngai thu pui ber
ta a nih hi. Napang chu heng infiamnaah leh zirtirna hmunah te a awm
loh kar chhungin TV bulah thuin a lo reng a ni fo thin. TV chuan
napang hun hlu tak pawn a pawnto te, lehkha chhiar hun te, homework
tih hun te, chhungkaw inkawm hlim hun te, mi dang nena inkawm khawmna
hun te leh an hun tha tam tak chu a rawk sak a ni.
"TV enna tur hian thiam thil a ngai lova, thiamna a pe bawk lo ani"
tiin Neil Postman chuan `Naupangte kal bona chhan' tih buah a ziak a
ni.



HLIMLOHNA LEH NGAIHTHAHNA TI TAM TU:
TV a kan hmuh thil mawi tak tak te leh thilziak nalh tak tak te
hian kan nun a tihlim theih laiin kan nunah hlim lohna ti chhuak thei
thil fakna en hah tlak tak tak a awm bawk a ni. Science leh
technology lam a zir tur tha tam tak te a awm rual rualin thil
tangkai lo leh ho mai mai hman tangkaina tur pawh awm lo a awm thin a
ni.

KHAWTLANG LAM NUNAH ENGE A THEN?
`US News & World Report' tih chanchinbu in a tarlan danin: America
rama mi kum 6 atangin kum 18 te hian nikhatah dar kar 15,000 vel TV
an en thin a, school a an hun hman aiin dar kar 2,000 a tam TV en nan
hun an seng ral a ni.

Time chanchinbu a thuziak pakhat chuangah chuan: 'TV hian kan
naupangte a ti chhia em?' tih a ni a. A ziaktu Zoglin chuan he ti
hian a sawi zawm a: "TV kaihhruaina a zarah napangte chu khawvel
chanchin hrang hrang te hriattirin an awm a, tun hma hun ai chuan an
beng var zawk em em a. Mahse chung avang chuan an fin zawk phah
em..? Naupangte chanchin na zirna Yale hmunah chuan, riru lam zirmi
mithiam Jerome Singer chuan "Naupang TV en nana hun tamtak seng thin
mi te hi thil man chakna lamah an pachhia a, an awm hle hle thei
lova, zirna lamah pawh an chak lo a ni", a ti. TV chuan zirna class
room chhungah te pawh nghawng a rawn nei tan a. Mathematics
zirtirtu, class a chawh tur sei deuh hlek a hrilhfiah thin te chuan
an ti tlem tial tial tan a. Singer Neil Postman, New York University
a professor nilai `Amusing Ourselves to Death' tih ziaktu chuan TV
hian puitling te thuruk chu a hai lang a, chu chuan naupang te nun la
no leh pawisawi lo tak mai chu a ti chhia a ni tih hi a ring a. He
tiang hian, "TV a puitling leh naupang nun inpawlh, chiang lo ruai
mai lo langah te chuan naupang si puitling tak a chet tumna leh
puitling si naupang taka chetna te kan hmu thin a ni", a ti.

TV in a nghawng tha lo te chu eng pawh lo ni ta se la, a hlauhawmna
leh in vaukhanna te pawh a hluar zel bawk a. Chu chu tunlai hian
intinah kan hre chamchi ta a nih hi. Chung a that lohna kan sawi thin
te chu a dik em? Dik teh reng mai…a tlangpuiin a dik zel a ni. Mi
chik mi te reng reng chuan TV in a ngawng thatlohna hrang hrang kan
han tarlan te khan inchhung khur leh khawthlang tichhe tu a ni tih hi
an ngaihdan a ni. Chu thu dik tak mai chu hre reng chung chuan TV hi
kan la ngaina tlat si a nih hi.

Engpawhnise, heng buaina te hi tum phawt chuan sut kian dan kawng a
awm a. Chumi tur chuan taihmakna, thawhrimna leh remhriatna te nu
leh pa te'n an neih a ngai a. He mi atan hian kan thawrim a kan
hunte kan sen phawt chuan rah tha tak a nei ngei dawn a ni.

Kan vanin panna kawng a kan fate venghim tu tur kan nihna laiah
hian kan hna chanve chauh hi kan thawk fo thin. Van khua leh tui kan
nihna ah hian khawtlang venhimna hna hi kan mawhphurhna a ni a. Kan
in leh lo kan venhimna ai mahin helamah hian kan thawh nasat a ngai
a. Kan khawtlang nun hi kan humhalh loh chuan chhiat lam pan mai
thei reng a ni si a.

INVENHIMNA TUR ATANA HMANRUATE:
Tunlaiah hian TV hi minti awmnuam tu, nau awm tu, nu leh pa leh
zirna tenau a lo ni ta in, hmandan thiam chuan thil tangkai thei tak
a ni bawk a. A hmanna dik tak a hman hi a pawimawh em em a ni. TV a
programme te hi thil sual a ni hauh lo mai. Mahse nu leh pa te hian
fate tana en tur tha kan thlansakna kawngah te leh a tangkaina zawng
hrilhfiah kawngah te mawhphurhna lian tak an nei a ni.

A tlangpui thuah mi TV en te hian tum lawk leh ngaihtuah lawk
lohvin kan en a. TV en mi sing tam tak te hian ngaihtuah vak lem
lovin a en ve mai mai bawk a. Kan hna thawhna atangin inah kan han
haw a, chutah TV kan han tinung chawt a, "kan khawhar min hnem tu leh
min lo uap lum atan". Chutah kan duh zawng tak programme a lo chhuak
a, chumi a zawh hnu pawhin TV chu off ta mai lo chuan a dawt leh
programme thum vel thleng emaw chu en nan hun kan hmang ta thin a ni.
Kan TV enna kawng a inthununnaah hian thutihthlukna siam hi thil
pawimawh pakhat a ni a. A tak tak a tih erawh chu thil dang pakhat
leh a ni! A hnuai a mi te hi chhungkaw tam takin kan zawm tur a tan a
thil tha tarlan te an ni:
· Endan tur chin tawk nghet takin duang la. Chhung kaw tan
eng ang a tam nge en a tul tih siam fel ang che.
· TV en hmain lehkha zirturte leh hnadang pawimawh te chu kan
ti zo vek phawt tur a ni.
· I fa nen TV in en thin ho thin tur a ni.
· TV programmeahte chuan hlutna leh hlawkna a awm nge awm lo
tih i in zawt fo thin tur a ni a. TV programmete chu a entu napang
kum nen a in mil em tihte, mipat hmeichhiat hman khawlohna kawngah mi
a hruai thei em? tihte, tharum thawhna lampang a nih leh nih lohte,
zirtirna tha naupang hnena i pek thin angte a keng tel em? tih leh an
TV en kha a hlawk thei ang berin an chhawr em? tihte i chhut fo thin
tur a ni.
· A hunah chuan TV chu off hreh suh.
· Chanchinthar en zawh a TV i off-in tul lovah chuan on tawh
suh.
· Chindantha chu suangtuahna thaah a innghat a. TV en hun
chintawk tur chu fel takin siam la. Chhungkaw hna tul thawh hun tur
siam fel thin ang che.
· I chhungkua leh I fate nen nitin inkungkaihna tha; titi hona
hunte thil chhiar hona hunte nei thin la. Chhungkaw tamtakah chuan
TV enna hian hun tha tam tak a luahlan a. Fate'n TV programme thate
en thin bawk mahse, an ngaihtuahna thil tha lamah a chawm lo a ni.
· Kar khar chhung TV ngaihtuah miah lovin awm han awm chhin
teh.
· Ngaihtuahna fim tak hmang chungin TV en dan chin tawk tur
chu duang la. TV enna hun aiah khan naupangte'n thil hlimawm leh
tangkai an tihna tur ngaihtuah tel ang che, napangte'n niawm an tih
lohna turin.
· Chhiar tur tha chiar nan hun hmang tam ula, a hma ai a nasa
zawkin.
· Cable TV kan tih ho hian a pangngai aiin hmuh tur chi hrang
a pek tam avangin a to zawk a. TV thalo zawng a hmanna tur vennan
chuan Cable TV lei hi pawh loh a tha a ni.
A TAWK LEKA TV EN THATNA TE:

Hna dang tangkai tihna hun a tam ang.
Chhungkua inkawm tlanna hun tha a tam ang.
Taksa insawizawina hun a tam ang.
Englai pawh a hmawsawm eina lakah mi a veng.
Mit tan hahdamna hun a tam zawk.
Zanah mut hahchawlhna hun a lo tam ang. Hahchawlhna hi taksa tana
chaw tha tak a ni si a.
Rilru chu lungaihna leh khawvel thil lam ngaihtuahna buai tak atangin
a lo zalen zawk ang.
Kan chaknate hman ralin a awm lovang.
Electric bill a lo tlem zawk bawk ang.
Pathian hnena in hlanna hun tur te a I lo nei tam ang a, I riru leh
thlarau te a lo thang bawk ang. "Pathian hriatna chuan muana a pe a,
Pahthian hriat lohna chuan muan lohna a thlen thung".

I nun chu pawtsei turin thuneihna I nei lova, mahse a zau zawng, thuk
zawng leh san zawngte I ti dang lam thei a ni.

Rilru ngaihtuahna hi taksa laipui a ni a. Mi a pumin a thunun a.
Kanthiltih chhia leh tha zawng zawngte hi kan ngaihtuahna atanga
lochhuak a ni. Pathiankan biak paw'n kan rilruin a bia a. Chuvang
chuan a dik apiangte, a zahawmapiangte, a tha a piamgte, a thianghlim
apiangte, a duhawm apiangte, fakna reng a awm a, fak tlak a nih bawk
chuan—chungthilte chu ngaihtuah thin rawh u .

No comments:

Post a Comment