Thursday, January 25, 2007

Human Development Mizoram

Human Development in Mizoram.

Khawvel a lo chankang ve zel a, keini mizo te pawh hma kan sawn ve zel. Lekhathiam lamah kan sang hle, mahse hriselna lam ah hian kan tla chhe viau a ni. Insumna lampang ah te kan tlak hniam deuh avang te pawh a ni thei. Chubak ah, zoram lo hmasawn zel ah hian, mihausa leh mirethei inkar a zau tial tial a ni. Hemi hausa leh rethei inkar zau zel dai dang tur hian Zoram ah hian Zirna in sang zawk tun ai a tha leh Insurance, a bik tak in mi harsa leh zawk te tanpui nan hmanrua tangkai tak a nih theih ka ring tlat a ni.

Ram changkang leh changkang lo tehfung pakhat chu Human Development Indexan tih hi a ni, hetah an tehna ber chu ram chhung an living standard, lekhathiam zat, a nawlpui a mihring damrei chhung a ni tlangpui. He tehfung hi Pakistani Economist Mahbub Ul Haq a hmuhchhuah a ni. Keini Mizo te pawh hi India ram hmarchhak state zing ah chuan a sang ber pawl kan ni, kan living index chu 0.548 a ni, a chawhkhawm in, India ram state zawng zawng HDI chu 0.389 chauh a ni. Ram changkang zawk ho te hi chu point 0.8 aia sang an ni tlangpui.

Ram hmasawnna tan nan hian a ram hausak zawng ringawtin teh tum lovin, mihausa leh mirethei inkar tihniam a, mi vantlang nawlpuiin nuam takin nun hmang thei se, a duhthusam awm zawk deih a ni. Entirnan, China ram mi tam tak zing ah billionaire 1 pawh an neih loh lai in, India ram ve thung ah Billionaire 20 ai tam kan nei, mahse China aiin kan ram a rethei zawk, mi harsa tak tak leh ei in pawh nei lo awm lai a, mi hausa lutuk khawvel top 10 ah pawh lang pha neih tho si kha, hmasawnna chu a nih theih a rinawm loh a ni. Keini, India ram kilkhawr state ah tal hi chuan, hetiang a mi harsa , rethei lonei mi te leh mi khawpui a mi awmthei, sorkar hnathawk leh sumdawng te inkar a inhlat zel hma hian, hma kan lak a tul ve a ni. He article ah hian kan HDI hniam nachhan leh kan hmasawn theihna tur kawng te han chhui teh ang u.

Lekhathiamna lampang ah chuan, a hming chuan India ram state zing ah pahnihna kan ni, a hming in Central University kan nei ve bawk a ni, mahse kan mithiam chherchhuah te an hmantlak nge hmantlak loh tih chu zawhna lian tak a awm thei a ni. Tunlai kan CM in a vei em em missionary 100,000 thawn chhuah hi a ropui khawp mai, mahse chu ai mah chuan kan missionary thawnchhuah te kha mithiam ni thei se a va duhawm dawn em. State khat ni ve reng bawk si, Medical, Engineering emaw Management Institute pakhat mah kan nei lo te pawh hi, hmalakna tur pawimawh tak a niin ka hria. Primary Education pawimawh zia chu kan hre theuh ang a, Pathian zarah missionary te an rawn kal avangin ziak leh chhiar te kan thiam ve a ni mai a, mahse tunlai khawvel ah hna hmu tur leh hmasawn zel tur chuan zirna sang zawk leh hma kan sawn zel theih na tur zirna in kan mamawh a ni. Keimahni ang a ram rethei ve tho, Phillipines ang ah te chuan an Sorkar in Nurse, Doctor leh Engineer te an train chhuak a, ram dang ah hna thawk in, pawisa an rawn thawn let leh zawk a ni. Zoram ah sorkar hna a tam tawk a nih loh pawh in, ram dang a hna chhawr theih na tlak tur khawp zirna tur nei thei I la, kan tangkai pui viau in a rinawm.

Khawvel a ram ropui ber leh lekha zirna neih changkang na ber, USA ah te pawh sawn an University lar ber leh tha ber te chu Kohhran tan deuh vek a ni, entirnan: Harvard Univeristy – Pastor Harvard a hming a seminary tan a ni, Princeton University – Presbyterian Kohhran ho tan, Brown University – Baptist Kohhran tan a ni leh bawk tlat. Kan Zoram ah te pawh hian kan school tha ber te pawh hi Kohhran School tan an ni leh tlat, entirnan St. Paul’s school – Roman Catholic, PC Girls Hr Sec – Presbyterian, Serkawn Hr Sec – Baptist, Helen Lowry – Adventist ho school te a ni ve leh tlat., heng school te hi ram changkang zawk an tih dan entawn in, kan School te hi private college emaw University a din choh dan kan Kohran te hian ngaihtuah se, mi tam tak in Zirna tur tha an neih theih phah a rinawm. Kumtin harsa chung chung in Zoram pawn ah thiamna zawng in phai lamah harsa takin lekhazir tur in kan kal thin , a tlem ber ah 20,000 ai tlem lo tur ah in ngai ta ila, thla khat ah mi pakhat zel in Rs 2,000 vel lo hmang ta zel se, thla tin 40,000,000 vel kan hmang ang a nia, Kum khat a kan hman zat chu 480,000,000 vel a ni tlat mai. Heti zo zai Zoram pawn ah sum kan thawn chhuah hi, kan ram ah heng sum hmanna nepnawi leh sumdawng te in hlawhna tur hi hlauh zel in, Vai ram ah vai ho kan chawm ringawt mai a ni.. Hetiang a sum tam tak thawn chhuah ai chuan, kan Kohhran te, kan sawma pakhat pekna te pawh hian kan Zoram tan lekhazirna College tha deuh, ram dang atang pawh a rawn pan theihna turin, Zirna in tha tak, zirtirtu tha tak hmang bawk si in, hma han la thei se, kan unau te, phai ram a lekha zirna man nei ve lo te tan a va duhawm dawn em.

Hriselna lampang ah hian keini Mizo te hi kan hniam leh em em a ni, Zoram ah hian Zu khap mahse Zial erawh an khap chuang bawk si lo. Hmarchhak state dang nei loh, Mizoram House, Mumbai Tata Cancer damdawi in bul ah te, Guwahati ah te leh Vellore ah te Cancer tuar kan nei tam lutuk te hi, Hriselna kan inzirtir loh vang a ni thei ang em? Kan kohhran Upa te’n Zu do chungin meizial an zu pat pat tlat, mizoram mipui kan hrisel loh hian keimahni chauh kan tuar lo, kan chhungten damdawi leh daktawr inentirna sum sen a ngaih avangin kan rethei, chuan Zoram a chhungkua cheng te hrisel loh vang a kan retheih chuan Zoram pawh kan retheih phah zel a ni. Chanchinbu a kan chhiar theih chinah chuan Mizoram hian khawvel ah per capita in Cancer tam na ber pahnihna kan ni tlat, a hmasaber Japan ram niin. Hetiang ram changkang natna, ram rethei tak mai in kan nei hi thil zahthlak tak a ni. Japan ram ah te chuan Cancer te pawh la nei reng te pawh ni se, anni chu, an Sorkar in free check up leh Insurance an tih sak thlap a ni.

Cancer do tur hian engtin nge kan tih dawn? Cigarette kawm ah “Smoking is injurious to health” tih chu kan hre vek. Rawtna pakhat ka neih chu ram changkang zawk a an tih angin Mizoram ah pawh hian hrisel lo te tan Mizoram Health Insurance System hi tan ve mai a tha in ka hria.

A rethei a hausa in Meizial zuk kan uar vek bawk si a, kan Sorkar hian dan in hna nei tawh phawt (salaried) chuan Health Insurance dan in, lei ngei ngei tur tiin dan han chhuah se. Amerawh chu, Health Insurance pe tur hian zoram a mipui zawng zawng hian kan pek theih a rinawm loh a ni. Tunah kan hriat theih chin ah Mizoram ah mi 921,970 kan awm a ni[9]. Chung ho zingah chuan 469,597 vel in hna kan thawk a ni. 52.7% vel in hna kan thawk ang a ni. Sorkar hnathawk hi 56,257 vel an ni leh bawk, hnathawk zing ah 11.9% an ni tlat, a awmzia chu mi 100 zel ah sorkar hnathawk 6 kan nei a ni. A awmzia chu Zoram hmasawnna tur a sum rawn lut hi Mizoram a sorkar hnathawk 6% in 40% a kan state budget hi hlawh a tan an la lut a ni.Heng kan Sorkar hnathawk tlem te hian in Sorkar hnenah hlawh pun te an la phut zui leh nghal. Income tha pangngai nei, Sorkar pawhin medical bill a pek sak te hi kan thingtlang unau, lonei mi te, eizawnna nei mumal lo te tan hian sorkar hian an income ah tax la ta se, chanhai ho tan a ziaawm deuh a rinawm a ni. Tunah entirnan, damdawi in awm man leh accident lak a invenhim nan, mipakhat tan kum khat a chawi zat tur chu Rs 1,181.00chauh a ni, thla tin a chawi zat tur chhut chuan Rs 98.41 chawi ngai ang vel a ni, hei hian damlo te tan engemaw chin chu damlo senso tur Rs 50,000 chin vel chu Insurance company khan a pe thei dawn a ni. Tunah kan Sorkar a hnathawk te Mizoram ah 6% a ni, kan hriat ve dan chuan, hnathawk pangngai tak tak leh awmthei deuh te 92,197 vel lo ni ta se, he mi 10% mi hausa ho hian Mizoram a kan BPL chhungkua harsa leh zual te 30% vel Medical Insurance chu a tax theih mai in a rinawm, mizoram awmthei deuh 10% , 92,197 in mizoram a harsa leh zual 30% mi 276,591 vel tan thla tin Rs 295.23 lek han sen chu an tan a na lutuk in a rinawm loh, mi harsa leh chanhai zawk te tan erawh chuan Rs 1 lek pawh hi thil hlu tak leh hmuh harsa tak a ni thei tlat.

Zoram ah rethei leh hausa inkar hi kan tih zim zawk nan, sawi tawh ang khan kan hnathawk te atang hian sorkar hian chhiah la se, chuan a theih chuan he sum hi Health Insurance leh Medical care ringawt ni lovin, piangsual te, tar te, hna nei lo te, thalai drugs ti te leh nawhchizuar te buaipui nan hmang ta zawk se, a tha zawk awm ma nge. Zirna lam ah pawh hma kan sawn zel bak ah mi tam zawk in lekha zirna tha kan neih theih nan, Zoram ah hian College tha tak tak te hi Phai ram atang pawh a rawn pan theih tur khawp a tha siam zel I la, hma chu kan sawn zel thei in a rin awm. Keini Zoram ah pawh hma kan sawn zel , phai ram atang in dawr changkang tak tak te pawh Mizoram ah branch te an rawn hawng zel a, kan fashion lah a sang bawk, mahse a neinung leh rethei kar a inhlat zel , hetiang a Mizoram hausa leh rethei inkar a nasat lutuk chuan kan lungrualna kehdarh ni a la awm ngei ang, Hetiang thil a awm hma hian , kan rethei leh hausa inkar tih bo dan hi I dap tlang ang u.

Reference:

http://hdr.undp.org/

http://www.pia.gov.ph/?m=12&fi=p070117.htm&no=15

1 comment:

  1. hehe Ka Pu chu i ziak tha thei hle mai. Nikhatah i van post hnem thei emmm emmm! :-) Keichu kar khatah ka update ve trawk.. an rei telh telh a nga, nitin post 2-3 vel publish i peih nge peih lo chu ka lo en chhin ang :-D

    Carry on blogging, and God bless.

    ReplyDelete